Það kom að því.  Blessað barnið bara orðin 4.ára gömul.  Heljar veisla var haldin í gær og ekki laust við að foreldrarnir væru nokkuð fegnir þegar komið var að kvöldi.  En þetta var alveg ógurlega gaman.

Tók inn á dögunum 2.vetra fola í þeim tilgangi að gera bandvanann og spekja hann aðeins, en það er stóðhestefni sem ég á með Brynleifi í Dalsmynni og heitir Kraftur frá Dalsmynni.  Ekki líst okkur félögunum ver á gripinn eftir að vera búnir að taka hann inn því þetta er geðprýðis foli, stór og myndarlegur og rúllandi töltgengur.  Ætternið bendir líka til þess að þarna gæti verið býsna mikið tölt í genunum og vonandi gæðingsefni.  Faðir hans er Þristur frá Feti og móðirin heitir Iða frá Dalsmynni, 1.verðlauna hryssa sem Brynleifur á.  Kraftur fór út um helgina aftur og flugteymist um allt og er bara notalegur í umgengni.  Ég held að þessi hestur verði notaður í sumar á eina hryssu hjá okkur.

Svo er fínasta lag á tamningum, það eru að vísu að fara nokkur hross út núna um mánaðarmótin og því verður líklega rólegra í framhaldinu, en það er svosem nóg annað hægt að hafa fyrir stafni, td líður að því að maður fari að setja upp sauðburðaraðstöðu og koma öllu því í lag.  Búnaðarfélagið hélt sinn aðalfund á dögunum og voru sýndar þar niðurstöður ársins hjá þeim bæjum á svæðinu sem eru í skýrsluhaldi í sauðfjárrækt.  Grindur komu þar ákaflega vel út en þess ber að geta að nokkuð færra fé er hjá okkur en þeim bæjum sem voru í kring um okkur á töflunni.  Við vorum á topp 5 listanum fyrir gerð, þunga, frjósemi og fjölda lamba eftir hverja á sem skilar sér af fjalli en þar vorum við efst á lista.  Svo voru veitt verðlaun fyrir efsta lambhrút á svæðinu og efsta veturgamla hrút, og voru glæsilegir hrútar sem hlutu verðlaunin.

En ætli þetta sé ekki bara orðið ágætt í bili.

Ekki oft sem maður fær tækifæri til að setja inn fréttir á hlaupársdegi svo það er um að gera að nota daginn.  Það er nú svosem ekkert klikkað í gangi annað en það er rúningur framundan, og svo útreiðar.  En það er að fara hestur heim sem er búinn að vera í tamningu núna í 3 mánuði frá Garði í Hegranesi.  Enn einn gæðingurinn sem kemur frá því búi, en ég hef verið svo heppinn að fá að kynnast þeim nokkrum þaðan.  Svo er ég að setja út hross frá mér sem eru búin að vera inni síðan í desember og fá núna frí, enda mikið búið að  breytast í þeirra lífi síðan þau komu inn í desember, ósnert tryppin eru orðin vel reiðfær hestefni. 

Svo er byrjað að velta fyrir sér stóðhestum fyrir sumarið, og hvort og hvaða hryssum eigi að halda, en það gætu orðið breytingar í þeim efnum fram til síðustu stundar.

En þá er það bara rúningurinn framundan.

Skyldi þessi eiga eftir að hrópa JÆJA í hestaferðum?

Hver kannast ekki við í hestaferðum og jafnvel heimsóknum þegar JÆJA hljómar.  Þá er sterklega gefið til kynna að áfram skuli haldið og ekkert slugs dugi lengur.  Menn skulu gjöra svo vel og koma sér í hnakkinn og fara að hugsa sér til hreyfings.  Þannig er það í tamningunum þessa dagana, það er bara að halda áfram og vinna.  Jæja.

Í kvöld fer meistaradeild Norðurlands af stað með látum, sjálfur kemst ég ekki til að horfa því miður því ég hef lofað tíma mínum í annað næstu vikurnar en það er undirbúningur á verki hjá Leikfélagi Hofsóss þar sem kallinn ætlar að sýna leiklistarhæfileika sína.

Merkisfrétt vikunnar er líklega hvarfið dularfulla á heimiliskettinum, en hún fór á dögunum í eitthvert óútskýranlegt ferðalag og vorum við farin að undrast um hana.  Svo erum við stödd á Akureyri á laugardagskvöldinu og fáum símhringingu úr Hofsósi og spurt hvort að kötturinn sé týndur, þá hafði hún verið í burtu á 4. sólarhring.  Svo þegar við komum heim seinna um kvöldið sóttum við umræddan kött og fórum með heim og það voru miklir fagnaðarfundir hjá Bjarkey og kettinum um morguninn.

JÆJA... svona gengur þetta.

Þær ganga nokkuð vel tamningarnar þessa dagana, gott veður til útreiða og hrossin komin vel á veg.  Einhver hross fara til eigenda sinna um mánaðarmótin næstu svo það er eitthvað að losna af plássum líka ef fólk hefur áhuga á að koma hrossum í tamningu, eða þjálfun. 

En þar fyrir utan gengur lífið sinn vanagang í dalnum, þorrinn er langt kominn og ekki laust við að maður sé farinn að huga að rúningi og í svona tíð eins og er búin að vera þá er smá vor í manni líka.  En fyrst að farið er að rita um kindur þá eru þær blessaðar mikið á beit þessa dagana eftir að það tók svona vel upp, fara í fjallið og bíta þar lyng og í kringum læki og koma svo heim á kvöldin og liggja þar, það er býsna skemmtilegt að fylgjast með þeim.  En svo á ég von á að fá síld líka fljótlega svo það verður kærkominn fóðurbætir fyrir þær að fá hana ofan á beitina.

Ætli þetta sé ekki bara gott í bili...

Hvernig var það var ekki búið að lofa hérna pistli ársins 2011?

Það setti allt á svartakaf í snjó í janúar og var það nú eiginlega síðasti snjór vetrarins allavega í einhverju magni en svo tók upp eftir það.  Prýðis útreiðarveður var og gengu tamningar vel þar sem graðhestur frá Brynleifi og hryssa í minni eigu voru topparnir og héldu sér þar út veturinn.  Svona leið veturinn með hinu ýmsa skaki eins og gengur og svo fór að líða undir vor.  Fyrstu sæðingslömbin komu í heiminn en það voru goltóttar gimbrar undan Grábotna.  Já vorið stóð lengi yfir og var kalt og andstyggilegt og allur búpeningur var á gjöf langt fram í júní en það var ekki fyrr en um mánaðarmótin júní/júlí sem eitthvað fór að hlýna að ráði.  Sprettutíð var með lakara móti þetta sumarið og víða heyjaðist ver en síðustu ár, og sumstaðar mikið ver.  Sjálfur var ég heyjandi alla króka og kima sem ég komst í og út um allar koppagrundir til að búa sem best fyrir veturinn og held ég að það hafi á endanum orðið svo, þó það komi auðvitað ekki í ljós fyrr en í vor. 

Hestaferð var farin í Fagranes í júní og svo voru hestadagar haldnir á Siglufirði í ágúst.  Aðeins seldist af hrossum á árinu og veitti ekki af að losa um nokkur hross til að létta á gjöfinni í vetur.  Þau hross sem fóru á afrétti fóru seinna en síðustu ár en komu býsna vel út lítandi til baka.

Viðskiptalíf á bænum var með líflegra móti en það er búið að skipta út öllum bílum sem árið 2011 hófst með og einnig dráttarvél og geri aðrir betur.  Galloper bifreið var seld í haust og kom inn fyrir hann Mitsubishi L-200.  Hyundai Santa fe var seldur í vor og inn kom Toyota Corolla, svo í desember þá var Zetorinn seldur með trega og ekkasogum en inn kom fyrir hana Fiat 70-90 dráttarvél með ámoksturstækjum. 

Göngur og heimtur á fé:  Líkt og vorið var lélegt þá kom fyrsti snjórinn snemma í haust og líkt og sauðburður gekk vel þá voru heimtur ótrúlega góðar.  Þegar talning var gerð vantaði einungis tvö lömb og veturgamla á, sem reyndar skilaði sér svo á milli jóla og nýárs og með lambið sitt með.  Leiðangur var gerður í haust til að kaupa kynbótahrút á bæinn og er árangurs að vænta í vor.

Aðeins 1 folald kom í heiminn og var það skjóttur hestur undan Gammi frá Steinnesi, fékk sá nafnið Kveldúlfur.  Svo var aðeins einni hryssu haldið svo það verður ekki mikil fjölgun í hrossastóðinu í vor.

Í lok árs hafði hrossunum fækkað aðeins og á móti hafði kindum fjölgað, auk þess að hvolpur er kominn á heimilið sem er tík af border collie kyni og kemur hún úr Eyjafirði.  Fékk hún nafnið Gáta.

Svona gekk búskapurinn nokkurn vegin fyrir sig á Grindarbúinu á síðasta ári og nýtt ár bíður og nýjar áskoranir.

Kveðja úr dalnum.

Tók þessa frétt af vef feykis.

Sannkallaður jólaglaðningur

Þrír sleðamenn fóru af stað í Deildardalsafrétt í Skagafirði sl. miðvikudag í þeim tilgangi að athuga hvort eitthvert fé væri að finna þar.  Í leitirnar kom veturgömul ær með lambi frá bænum Grindum og var hún býsna ánægð er hún komst heim og í hús að sögn eiganda hennar, enda ekki ónýtt að mæta beint í fengitímann. 

 -Ærin og lambið voru nokkuð spræk þrátt fyrir að hafa verið úti allan þennan tíma en bæði búin að leggja nokkuð mikið af, sagði Rúnar Páll Hreinsson bóndi á Grindum.

-Gott sleðafæri er víða svo ef menn vita af eða vantar fé af fjalli er ekki úr vegi að nota gott veður og góða færð til að fara af stað og kanna málin. Þetta er sannkallaður jólaglaðningur, sagði Rúnar ánægður með heimtinguna.


Já það var ekkert smá ánægjulegt að fá hana þessa heim með lambinu sínu í þokkabót, en það er hrútur sem verður kópalinn sem sauður í vetur.  Ærin er komin í spil hjá hrút og allt í lukkunnar velstandi.  En nú er síðasti dagur ársins 2011 og nýtt ár handan við hornið, ég verð alltaf svona barnslega kvíðinn fyrir áramótum og því að kveðja gamla árið en þetta er víst gangurinn, einn kemur þá annar fer. 

Pistillinn verður birtur á nýju ári, en þeim sem hafa lagt leið sína á þessa síðu óska ég gleðilegs nýs árs með þökk fyrir árið sem er að líða.

Kveðja úr Deildardalnum þar sem ævintýrin gerast...

Hún líkist þessari nýja vélin sem er í hlaðinu heima.

Já hvað er að frétta?  Jólastressið hefur greinilega náð tökum á undirrituðum og svo spennufall strax í kjölfarið því ekki hefur nú verið sérstaklega mikill fréttaflutningur hér í næstum því 3 vikur.  En hér er nú það helsta:
Tamningar ganga sæmilega, reyndar hefur ekki verið neitt sérstaklega mikið útreiðarveður en það er unnið í inniaðstöðunni í staðinn, sem er gulls í gildi í svona tíð.  Svo er eitthvað meira að koma af hrossum í tamningu nú um áramótin og svo bætist við í janúar, svo að útlitið er bara gott fyrir veturinn.  Svo er líf hrútanna í miklum blóma þessa dagana en þeir kappkosta við að lemba og gera sér dagamun yfir hátíðirnar. 
Nýr traktor er einnig kominn á bæinn einskonar jólagjöf í dýrari kantinum en það er vél að gerðinni Fiat og er framdrifsvél með tækjum svo nú verður hægt að moka hlaðið ef það fyllir allt af snjó, og talandi um snjó eða öllu heldur skrifandi um snjó, þá lítur út fyrir að það verði harðfenni næstu vikur ef fram fer sem horfir, það hefur hlánað aðeins en fryst og jafnóðum aftur og nær alveg jarðlaust að verða.  Ekki nein sérstök tíð fyrir hross já og fleiri skepnur.  Sjálfur væri ég alveg til í að það tæki svolítið upp af þessum snjó og hlýnaði aðeins en þetta er jú Ísland svona getur þetta verið.

Svo er það pistill ársins á næsta leyti...

Dagur frá Strandarhöfði, er ekki föðurlaus lengur.  Mynd er tekin af vefnum hestafrettir.is

Þar kom að því, loksins er búið að taka hross á hús.  Ekki er nú hópurinn stór en það eru bæði hross frá okkur og öðrum.  Í vikunni breyttist meira að segja ætternið á einu trippinu okkar sem nú er komið inn en það er Dagsdóttir frá Strandarhöfði.  Það þykir orðið fullsannað að Dagur meistari er sonur hests sem Gandur heitir og er frá Skjálg, sá hestur er þó Náttfara sonur svo það er Náttfari í trippinu þó það sé ekki í gegn um Baldur frá Bakka eins og til stóð.  En það er allavega komið ætterni á trippið, sem við köllum Dagrúnu.

Svo voru fáeinar ær sæddar í byrjun mánaðar svo við ættum að fá fyrstu lömbin upp úr 20.apríl, en fengitími hefst þó ekki fyrr en í næstu viku.

Alhvít jörð er og nokkur snjór, sem er svosem í lagi, en það hafa líka verið nokkrar frosthörkur sem er kannski óvenjulegt miðað við árstíma, að það skuli vera svona ofboðslega kalt í desember.  Þó eru einhverjar líkur á að frostið minnki um helgina, sem væri mjög gott. 

Svo eru það bara tamningar framundan...